Corey Reece

Hoƥèʔn yaƥa yóḳ, ḳài kwala yaƥa yóḳ, sụ́x sẹ́m ƥiyín; ƈà-is ʔaltị yaƥa yóḳ, ḳài kwala, moxó ka ʔaltị̀ yaƥa yóḳ, mél ʔaltị̀ yaƥa yók. Kasiʔ heʔne spị́nsiʔ ànịʔ tạhòḳwal yóḳ, sẹ́msìʔ sinhòḳwal yóḳ, ka kaʔal spị́n lạ́ṗḳ.

Heʔne ƈạụ́ pa-ihị́lxḳ, aka ʔaltị ṭkạ ƈạụ́ lạ́ṗḳ. Kanẹhiʔ heʔne xàmhi lạ́ṗiaoḳ, ḳài kwala xàmhi lạ́ṗḳ. Hèʔne spị́n lạ́ṗḳ kwelxìya ạ̀ƙa yowòʔ. Heʔne ʔaltị sụ́x pạtaweị́ḳ, kà kaʔal pọ ʔaltị pạtawàʔ. Ànịʔ sinhòḳwal yòḳnaʔ spị́n, ànịʔ tạhòḳwal yòḳnaʔ ka kaʔal spị́nʔa xàmhi lạ́ṗḳ. Kanaʔnéx.

yaƥa wìlị ƙeméị pẹm ƥa·itịʔlọ̀ḳ emèʔsiʔ honoʔ ƥa·itịʔlọ̀ḳ, hèʔmeʔ honòʔ ƥa·itịʔọ̀ḳ, hakamkamán ƥa·itịʔlọ̀ḳ. hèʔne honoʔ hankilìṗ katáḳ hakamkamán, katàḳsiʔ mụxtànhi hankilíṗ. heʔne yạ̀siʔ wìli sitipị̀ ƙeméị́; heʔne katáḳsiʔ maƈáḳ wilị hẹlám, ṭkál ka hẹlàm ƙeméị́. kanẹ taḳtáṭ taƭapáḳ, hạ̀ʔya taƭapáḳ. kanẹ tetewilị̀tatìs ƙeméị́ taḳtaṭsìʔ tahòḳwal ƙeméị́ ƙiyị́x kanáo pa·ikináxtạ. kanẹsiʔ káƙan ƙeméị́, xạʔịskiƥìskap̣, kwelṭkạụ́ kinàx ƙeméị́; wili sitipị̀siʔ ƙeméị́. kanẹ taƭapáḳ haʔịṭpụ̀xṭpixiḳw. kanẹ leƥẹs hahọwọ̀ʔḳi, kanàṭ kitị alxalị yaƥá; ƥị yokạ̀ hassọ́, kasiʔ alxalịyanàʔ hạ̀ʔyaƥiyá. kanaʔnèx hoƥẹ̀ʔn yaƥaʔa wìlị; lep̣nìxa wilị̀ kanát. samàxasiʔ anaʔnèx alxalị ànịʔ wìli kanáo. kwàs wili yaxa wiṭkèyẹʔḳi kasiʔ ƥị́ yokạ̀ ƙeméị́ hapiní. kanaʔnex samàxa alxalị, anịʔ lep̣nìxa naṭ wìli kanáo.

xìlam sepéṭ háṗta lohóḳ. skìsitị́l nọ̀ƈaṭkwan yóḳ. kasiʔ nạ́ḳiḳ: “laps yimìxi hạ́ṗteḳ lohòitaʔ, laps yimìxi.” nakáihiʔ xilam sepéṭ. “anịʔ laps yịmị́spiʔn kwitìsiʔ yòʔṭ xilám yéọ́ḳiʔ,” nakà·ihiʔ skìsi. nọsiʔ yewèiʔ xilam sepéṭ. ƙotóṭ hạ́ṗtakwa lohòitaʔ. kanẹhiʔ tapalnìxa lạlẹ́. mị́hiʔ skìsi hạ́pta xìlam lạlẹ́. mị lohòiʔ. mị nọ̀uʔs kinìʔḳ xilam sepeṭ wạ́ta. “laps yimìxi hạṗtéḳ lohòitaʔ.” “ḳatì nakaịṭ,” xilam sepéṭ ka nakàiʔ. “họxaʔa maʔa ka nekèstam ‘laps yimìxi’ nakàspintaʔ: ‘yaƥa kwitị́ yòʔṭ yéọḳiʔ.’ mị́ hawàxioʔ hạṗtéḳ,” nakà·ihiʔ xilam sepéṭ. nọ̀siʔ skisi yewèiʔ. “skạ+” ṭakàiʔ. ka kaʔal pọ́ ànịʔ yaƥa yewèiʔ lohòitaʔ.

Wikàmti taƈanạ̀ṭ lạlẹ̀. Mị kuxwitẹ́ xilam lạlẹ̀.